समाजसेवी श्रेष्ठद्वारा विद्यार्थीलाई पोशाक र स्टेशनरी सहयोग

कक्षा ८ सम्म अध्यापन हुने सो विद्यालयका विद्यार्थीहरूका लागि समाजसेवी श्रेष्ठले करिब दुई लाख रुपैयाँ बराबरको एक सय थान ट्रयाकसुट र विभिन्न स्टेशनरी सामग्री प्रदान गर्नुभएको पत्रकार एवं सामाजिक अभियन्ता गोकर्ण प्रसाद भण्डारीले जानकारी दिए । विकट क्षेत्रका बालबालिकाको शिक्षामा टेवा पुर्‍याउने उद्देश्यले श्रेष्ठले व्यक्तिगत एवं संस्थागत पहलमा सो सहयोग गरेका हुन् । 

उत्तरी दुर्गम क्षेत्रमा अवस्थित गुर्जपा आधारभूत विद्यालयमा अध्ययनरत विद्यार्थीहरूमध्ये ९० प्रतिशत अति सिमान्कृत जाति थामी समुदायका छन् । बालबालिकाहरू निम्न तथा मध्यम वर्गीय परिवारका रहेकाले समाजसेवी श्रेष्ठबाट प्राप्त यो सहयोग अत्यन्तै समयसान्दर्भिक र उपलब्धिमूलक भएको विद्यालय व्यवस्थापन समितिका अध्यक्ष बलबहादुर थामीले बताए। यस्ता सहयोगी मनहरूले गर्दा नै दुर्गमका बालबालिकाको विद्यालय सम्मको पहुँच र सिकाइमा उत्साह थपिने उनको भ्याइ थियो ।

शुक्रबार विद्यालय व्यवस्थापन समितिका अध्यक्ष बलबहादुर थामीको सभापतित्वमा एक विशेष कार्यक्रमका बीच सो ट्रयाकसुट तथा स्टेशनरी सामग्री विद्यार्थीहरूलाई हस्तान्तरण गरिएको थियो । कार्यक्रममा पत्रकार चिरञ्जीवी मास्के, जीवन लामा, गोकर्ण प्रसाद भण्डारी, प्रधानाध्यापक यामकुमार पाण्डे, सहायक प्रधानाध्यापक खेमबहादुर थामी, शिक्षक लक्ष्मी ओली, र शिक्षक–अभिभावक संघकी निरमाया थामी लगायतले आ–आफ्नो मन्तव्य राख्दै दाता श्रेष्ठको परोपकारी कार्यको उच्च प्रशंसा गरेका थिए ।

सोही अवसरमा दुर्गमको शिक्षा क्षेत्रमा अतुलनीय योगदान पुर्‍याएबापत विद्यालयको तर्फबाट समाजसेवी प्रभुराम श्रेष्ठलाई विशेष सम्मान गरिएको थियो । साथै, सामाजिक क्षेत्रमा सक्रिय पत्रकार गोकर्णप्रसाद भण्डारीलाई पनि सम्मान पत्रद्वारा सम्मान गरिएको थियो ।