विश्व फेसनमा नयाँ नाम ‘फेकल म्याटर’

हलिउड अभिनेत्री जेन्डायाले ‘द ओडिसी’को न्यूयोर्क प्रिमियरमा लगाएको सेतो प्वाँखयुक्त एन्जेलिक गाउनले सबैको ध्यान तान्यो । तर पोसाक बनाउने फेसन हाउसको नाम भने पोसाकभन्दा बिल्कुलै फरक, ‘मातिएर फेकाल’ अर्थात् ‘फेकल म्याटर’ (मल) थियो ।
मोन्ट्रियलमा एक दशकअघि विद्यार्थी जीवनमै स्टिभन राज भास्करन र हाना रोज डाल्टनले सुरु गरेको यो पेरिसस्थित उच्चस्तरीय फेसन ब्रान्ड अहिले विश्व फेसनमा तीव्र गतिमा चर्चित भइरहेको छ । उनीहरूले डिपपजस्ता दोस्रो हातका सामान बिक्री हुने प्लेटफर्मबाट यात्रा सुरु गरी पेरिस फेसन विकसम्म पुगेका हुन् ।
ब्रान्डको अनौठो नाम पनि फेसन उद्योगप्रतिको उनीहरूको दृष्टिकोणसँग जोडिएको छ । डाल्टनका अनुसार उद्योगको फोहोर पक्षलाई जनाउने एउटा अश्लील शब्दलाई वैज्ञानिक र ‘ग्ल्यामरस’ सुनिने बनाउन फ्रेन्चमा ‘मातिएर फेकाल’ नाम राखिएको हो । भास्करनले यसले फेसन उद्योगको अपव्ययी पक्षलाई चुनौती दिने उद्देश्य बोकेको बताएका छन् ।
सेतो मेकअप, खौरिएका टाउका र भौँ, मानव खुट्टाजस्ता देखिने छालाका जुत्ता तथा असामान्य डिजाइन उनीहरूको पहिचान बनेका छन् । लेडी गागा, म्याडोना, काइली जेनर, डेमी मुरलगायत चर्चित कलाकारले उनीहरूका डिजाइन लगाइसकेका छन् ।
२०२४ मा डोभर स्ट्रिट मार्केटको सहयोग पाएपछि ब्रान्डले थप गति लियो । गत वर्ष पेरिस फेसन विकको आधिकारिक क्यालेन्डरमा प्रवेश गरेको यस ब्रान्डले मार्चमा ‘द वन पर्सेन्ट’ नामक संग्रह सार्वजनिक गरेको थियो ।
जेन्डायाको स्वर्गदूतजस्तो सेतो पोसाकदेखि गागाको कालो प्वाँखयुक्त गाउनसम्म, ‘फेकल म्याटर’ अहिले परम्परागत फेसनभन्दा बिल्कुलै फरक संसार निर्माण गरिरहेको छ । आगामी सेप्टेम्बरको पेरिस फेसन विकमा उनीहरूको नयाँ प्रस्तुति हेर्न फेसनप्रेमी उत्सुक छन् ।