घिसिङलाई शाक्यको फेसबुकबाटै बधाइ

काठमाडौं । नेपाल विद्युत् प्राधिकरणका कार्यकारी निर्देशक हितेन्द्रदेव शाक्यले नवनियुक्त ऊर्जा, जलस्रोत तथा सिँचाइ मन्त्री कुलमान घिसिङलाई फेसबुकमार्फत बधाई दिएका छन् । घिसिङ सोमबार उर्जासँगै, भौतिक पूर्वाधार तथा यातायात र सहरी विकास मन्त्री नियुक्त भएका थिए । शाक्यले सामाजिक सञ्जाल फेसबुकमा स्टाटस लेख्दै विद्युत् प्राधिकरणको विभागीय मन्त्री भएकोमा बधाई दिएका हुन् ।

शाक्यले आफ्नो स्टाटसमा लेखेका छन्, ‘ऊर्जा क्षेत्रमा विशिष्ट योगदान दिनुभएका कुलमान घिसिङज्यू नयाँ नेपालको ऊर्जा जलस्रोत तथा सिँचाइमन्त्री नियुक्त हुनुभएकोमा हार्दिक बधाई छ । सफल कार्यकाल र उत्तरोत्तर प्रगतिका लागि हार्दिक शुभकामना साथै सम्पूर्ण ऊर्जा क्षेत्रको सफलतासहितको समृद्ध नेपालको समेत हार्दिक मंगलमय कामना व्यक्त गर्दछु।’

शाक्यको पहिलो कार्यकालमा उनलाई ऊर्जा मन्त्रालयमा पदस्थापन गरी घिसिङलाई विद्युत् प्राधिकरणको कार्यकारी निर्देशक बनाएदेखि दुई जनाबीच तिक्तता थियो । शाक्यले आफुलाई विद्युत् प्राधिकरणको नेतृत्वबाट प्रतिस्थापन गरेको भन्दै घिसिङको नियुक्तिविरुद्ध सर्वोच्च अदालतमा रिटसमेत हालेका थिए । 

केपी शर्मा ओली नेतृत्वको सरकारले फेरि घिसिङको दोस्रो कार्यकाल सकिन ४ महिना १३ दिन बाँकी छँदा उनलाई विद्युत् प्राधिकरणको कार्यकारी निर्देशकबाट बर्खास्त गरी शाक्यलाई नै ल्याएको थियो । यही कारण पनि दुवैबीचको सम्बन्ध सहज थिएन ।

दुवैजना विद्युत् प्राधिकरणका कुशल इञ्जिनियर हुन् । अहिले जेनजी समूहको आन्दोलनपछि बनेको नयाँ सरकारमा घिसिङ ऊर्जा मन्त्री बनेपछि शाक्यले बधाई दिएका हुन् ।