शिक्षालाई भविष्यका चुनौती र अवसरसँग जोडौँः राष्ट्रपति पौडेल

काठमाडौँ । राष्ट्रपति रामचन्द्र पौडेलले बदलिँदो विश्व परिवेशअनुरूप शिक्षा प्रणालीलाई परिमार्जन गर्दै विद्यार्थीलाई भविष्यका चुनौती सामना र अवसरको सदुपयोग गर्न सक्षम बनाउनुपर्ने बताए ।
पशुपति मित्र माध्यमिक विद्यालयको ८०औँ वर्ष प्रवेशका अवसरमा आज यहाँ आयोजित समारोहमा उनले विज्ञान, प्रविधि र कृत्रिम बौद्धिकताको तीव्र विकाससँगै शिक्षा प्रणालीको स्वरूप परिवर्तन भइरहेको बताए ।
कार्यक्रममा नेपाली कांग्रेसका सभापति गगनकुमार थापाले सामुदायिक विद्यालयहरूले पनि समयसापेक्ष र प्रविधिमैत्री शिक्षा र वातावरण निर्माण गर्न आग्रह गरे । त्यस्तै कामनपा ७ का अध्यक्ष विमलकुमार होडा, व्यवस्थापन समितिका अध्यक्ष अरूण सिंह बस्नेत र विद्यालयका प्रधानाध्यापक योग्यराज प्रसाइँले विद्यालयले आगामी दिनमा भौतिक तथा शैक्षिक विकासमा केन्द्रित रहेर गुणस्तरीय शिक्षामा विकास गर्ने प्रतिबद्धता जनाए ।