बुढीगण्डकी बाढीले अवरुद्ध विद्युत गोरखामा जोड्ने कार्य तीव्र

काठमाडौँ । ऊर्जा जलस्रोत तथा सिँचाइ मन्त्रालयले बुढीगण्डकी तथा यसको सहायक नदी स्यार खोला करिडोरमा आएको बाढीका कारण अवरुद्ध बनेको विद्युत् सेवा पुनः सञ्चालन गर्न आवश्यक मर्मत तथा पुनःस्थापनाका कार्यलाई तीव्रता दिएको छ ।
यसैक्रममा आरूघाट गाउँपालिका ३, केउरपानी र ढुंगेमा गरि २ वटा ट्रान्सफर्मर थप चार्ज गर्ने अन्तिम तयारी भइरहेको मन्त्रालयले जनाएको छ । 
नेपाल विद्युत प्राधिकरण आरूघाट वितरण केन्द्र, गोरखाकाअनुसार हालसम्म यस वितरण केन्द्रअन्तर्गत आरूघाट गाउँपालिका ३ सोती, लिदिङ र स्यामराङका ३ वटा ट्रान्सर्फमर र धार्चेका पुरै क्षेत्रहरूमा लाइन अवरुद्ध छ । बाँकी क्षेत्रहरूमा लाइन सुचारू भइसकेको छ । कर्मचारीहरु विहानै कार्यस्थलमा पुगे पनि सडक दिउँसो ३ बजे मात्र खुलेकाले कार्यमा अवरुद्ध हुन गएको बताइएको छ । ‘अझै रातिसम्म आरूघाटका सम्पूर्ण क्षेत्रहरू चार्ज गर्ने प्रयास जारी रहनेछ । सडक जति खुल्दै जान्छ, सोहीअनुसार लाइन मर्मत गरि सुचारु गर्दै जानेछौँ,’ आरूघाट वितरण केन्द्रले भनेको छ ।  
मन्त्रालयकाअनुसार बाढीले गोरखा र धादिङ जिल्लाका विभिन्न स्थानमा विद्युत् वितरण प्रणाली तथा जलविद्युत् आयोजनाहरूमा क्षति पुगेको छ । बाढीबाट बुढीगण्डकी, टाइम्स इनर्जी प्रालि (३४१ मे.वा.), दोभान खोला (२४.५ मे.वा.), यारु खोला (३०.५९ मे.वा.), माछा खोला (१६ मे.वा.) लगायतका जलविद्युत् आयोजनाका क्याम्प क्षेत्र, निर्माण उपकरण तथा सामग्री, बेलिब्रिज, पहुँच सडक र आयोजना स्थलसम्म पुग्ने पुलमा क्षति पुगेको छ ।
त्यसैगरी, गोरखाको धार्चे गाउँपालिकाका विभिन्न स्थानमा ७० भन्दा बढी उच्च भोल्टेज पोलसहित सोती, आर्खेत तथा आरुघाट बजार क्षेत्रमा वितरण लाइनका पोलहरूमा क्षति पुगेको छ । धादिङको त्रिपुरासुन्दरी गाउँपालिका–२, स्याउली बजार क्षेत्रमा समेत न्यून भोल्टेजका ६ वटा पोलमा क्षति पुगेको छ ।
मन्त्रालयका प्रवक्ता मोहन शाक्यकाअनुसार बाढीले अवरुद्ध भएलगत्तै प्राधिकरणले विद्युत सेवा सुचारु गर्न काम थालेको थियो । करिब १० घण्टामै भीमसेन थापा गाउँपालिका वडा नं. २, ३ र ४ मा विद्युत् सेवा सुचारु भएको थियो । यसैगरी आरुघाट बजारसहित आरुघाट गाउँपालिकाको डाँडागाउँ ब्रान्च र आरुपोखरी ब्रान्चमा विद्युत् सेवा पुनः सञ्चालनमा आएको थियो । 
मन्त्रालयले यसै हप्ताभित्र सबै ठाउँमा विद्युत् सेवा सुचारु गर्नेगरी काम भइरहेको जनाएको छ ।
उद्धार, राहत तथा पुनर्निर्माणमा तदारुकता
आइतबार बिहान सिरिङ्गे हिमालमा गएको हिमपहिरोले उइन्गुलुङ खोला थुनिएर गोरखाको बुढीगण्डकी नदीमा आएको बाढीपछि खोजी, उद्धार, राहत तथा पुनर्निर्माणका लागि सरकार तदारुकताका साथ लागिरहेको जनाइएको छ ।
प्रभावित क्षेत्रबाट १९ विदेशी नागरिकसहित ३१४ जनाको उद्धार गरिएको छ । ५ जना स्थानीय सम्पर्कविहीन रहेकाले सुरक्षाकर्मीहरूले खोजी कार्य जारी राखेको पनि गृहमन्त्रालयले जनाएको छ । बाढीपछि अहिलेसम्म विपद् जोखिम न्यूनीकरण तथा व्यवस्थापन प्राधिकरणको समन्वयमा ७०३ जना सुरक्षाकर्मी परिचालन भएको मन्त्रालयले स्पष्ट पारेको छ । 
आरुघाट जलमापन केन्द्रमा नदीको सतह खतराको तह (५ मिटर) नाघेर ८.४३ मिटरसम्म पुगेको थियो । बाढीको सम्भावित जोखिमबाट सुरक्षित राख्न करिब २ लाख नागरिकलाई पूर्वसूचना पठाउनुका साथै प्राधिकरणको कमान्ड पोस्टले तत्काल बैठक बसी अवस्थाको निरन्तर अनुगमन र उद्धार परिचालन सुरु गरेको थियो ।
बाढीले धादिङ र गोरखाका २ सय भन्दा धेरै घरमा क्षति पुग्नुका साथै डेढ सय जति चौरीगाई तथा भेडाबाख्रा बगाएको छ । खानेपानी, निर्माणाधीन जलविद्युत्, विद्यालयलगायतका संरचनासहित मनास्लु पदमार्ग र गोरखा–धादिङ जोड्ने मुख्य सडकका ३ पक्की पुल र २ झोलुङ्गे पुलमा क्षति पु¥याएको छ ।
सोमबार मात्रै काठमाडौंबाट हवाई साधनमार्फत गोरखाको फिलिममा ४ हजार २७० केजी खाद्यान्न र १ हजार ९०० लिटर हवाई इन्धन ढुवानी गरी आपत्कालीन राहत वितरण अघि बढाइएको राष्ट्रिय विपद जोखिम न्यूनीकरण तथा व्यवस्थापन प्राधिकरणले जनाएको छ । 
यसैबीच आरुघाट–सल्यानटार जोड्ने पुल पुनः सञ्चालन गर्न हेटौँडाबाट बेलिब्रिजका सामग्री ल्याएर निर्माण कार्य तीव्र पारिएको जनाइएको छ भने छेपारे भीरमा एक्स्काभेटर परिचालन गरी दोभान–सल्लेरी सडक खुलाउने प्रयास भइरहेको उल्लेख गरिएको छ । सरकारले दसैँअघि नै सम्पूर्ण अवरुद्ध सडकहरू सञ्चालनमा ल्याउने लक्ष्य राखेको जनाएको छ ।