तत्कालीन महाप्रबन्धकसहित आठ जना पक्राउ

काठमाडौं । सरकारी स्वामित्वको दुग्ध विकास संस्थान (डीडीसी) मा १२ करोड रुपैयाँभन्दा बढी आर्थिक अनियमितता गरेको आरोपमा तत्कालीन महाप्रबन्धकसहित आठ जना पक्राउ परेका छन् । संस्थानका तत्कालीन महाप्रबन्धक, प्रशासनिक तहका अधिकारी, चिस्यान केन्द्रका प्रमुख तथा कर्मचारीको मिलेमतोमा संस्थानलाई आर्थिक क्षति पु¥याएर गैरकानुनी लाभ लिएको प्रारम्भिक अनुसन्धानबाट खुलेको प्रहरीले जनाएको छ ।
प्रहरीका अनुसार पक्राउ परेकाहरूले पूर्वयोजनाअनुसार विभिन्न समूह खडा गरी संगठित सञ्जालमार्फत संस्थानको आर्थिक स्रोत दुरुपयोग गरेका थिए । प्रारम्भिक अनुसन्धानमा उनीहरूले संस्थानलाई प्रत्यक्ष रूपमा १२ करोड १३ लाख ४३ हजार ५३० रुपैयाँ आर्थिक हानि पु¥याई सोही बराबरको रकम गैरकानुनी रूपमा लाभ लिएको पुष्टि भएको छ ।
यस प्रकरणमा संलग्न रहेको आरोपमा प्रहरीले दुग्ध विकास संस्थानका तत्कालीन महाप्रबन्धकसहित आठ जनालाई कात्तिक १३ मा विभिन्न स्थानबाट पक्राउ गरेको हो । उनीहरूविरुद्ध मुलुकी अपराध संहिता, २०७४ अन्तर्गत आपराधिक विश्वासघात गर्न नहुने कसुर तथा संगठित अपराध निवारण ऐन, २०७० अन्तर्गतको कसुरमा अनुसन्धान भइरहेको छ ।
काठमाडौं जिल्ला अदालत, बबरमहलबाट पक्राउ अनुमति लिएर उनीहरूलाई नियन्त्रणमा लिइएको प्रहरीले जनाएको छ । पक्राउ परेकामाथि थप अनुसन्धान भइरहेको र आर्थिक अनियमिततामा उनीहरूको भूमिका तथा संलग्नताको प्रकृति पहिचान गर्ने काम भइरहेको प्रहरीको भनाइ छ ।
पक्राउ पर्नेमा संस्थानका तत्कालीन महाप्रबन्धक सञ्जीव झा पनि छन् । ४५ वर्षीय झा हाल दुग्ध विकास संस्थानको केन्द्रीय कार्यालय लैनचौरस्थित प्रशासन तथा व्यवस्थापन विभाग प्रमुखका रूपमा कार्यरत थिए । सर्लाहीको बलरा नगरपालिका–३ स्थायी घर भएका उनी काठमाडौंको कागेश्वरी मनोहरा नगरपालिका–६ मा बस्दै आएका थिए । उनलाई काठमाडौं महानगरपालिका–२६ स्थित लैनचौरबाट पक्राउ गरिएको हो ।
त्यस्तै, ४६ वर्षीय विजयकुमार यादव पनि पक्राउ परेका छन् । सिरहा नगरपालिका–१ स्थायी घर भएका यादव काठमाडौंको तारकेश्वर नगरपालिका–४ मा बस्दै आएका थिए । उनी तत्कालीन सिम्ले चिस्यान केन्द्रका इन्चार्ज थिए । हाल काठमाडौं दुग्ध वितरण आयोजना, बालाजुमा कनिष्ठ प्राविधिक सहायकका रूपमा कार्यरत यादवलाई बालाजुबाटै पक्राउ गरिएको प्रहरीले जनाएको छ ।
पक्राउ पर्ने अर्का व्यक्ति ५५ वर्षीय मनहरी शर्मा हुन् । पर्वतको मोदी गाउँपालिका–४ स्थायी घर भएका शर्मा काठमाडौंको तारकेश्वर नगरपालिका–६ मा बस्दै आएका थिए । उनी तत्कालीन भक्तपुर चिस्यान केन्द्रका इन्चार्ज थिए । हाल दुग्ध विकास संस्थानको केन्द्रीय कार्यालय लैनचौरमा कनिष्ठ प्राविधिक सहायकका रूपमा कार्यरत उनलाई कास्कीको पोखरा महानगरपालिका–१४ बाट पक्राउ गरिएको हो ।
त्यसैगरी, तत्कालीन चनौली चिस्यान केन्द्रका इन्चार्ज रामकेवल राय पनि पक्राउ परेका छन् । ४९ वर्षीय राय सर्लाहीको मोहनपुर गाविस–५ का स्थायी बासिन्दा हुन् । हाल चितवनको भरतपुर महानगरपालिका–५, कल्याणपुरमा बस्दै आएका उनी काठमाडौं दुग्ध वितरण आयोजनाको संकलन केन्द्रमा कनिष्ठ प्राविधिक सहायकका रूपमा कार्यरत थिए । उनलाई सर्लाहीको चन्द्रनगर गाउँपालिका–५, मोहनपुरबाट पक्राउ गरिएको प्रहरीले जनाएको छ ।
यस प्रकरणमा संस्थानका तल्लो तहका कर्मचारीसमेत पक्राउ परेका छन् । सर्लाहीको चन्द्रनगर गाउँपालिका–५ घर भएका २८ वर्षीय जितेन्द्रकुमार यादव पक्राउ परेका छन् । उनी हेटौंडास्थित बागमती धुलो दूध कारखानामा भरपाई पदमा कार्यरत थिए । उनलाई चितवनको भरतपुर महानगरपालिका–५, आनन्दपुरबाट नियन्त्रणमा लिइएको हो ।
त्यस्तै, सर्लाहीको चन्द्रनगर गाउँपालिका–२ घर भएका ३२ वर्षीय नवीन राय यादव पनि पक्राउ परेका छन् । उनी नवलपुर÷गरुडा चिस्यान केन्द्रमा डेरी ब्वाई पदमा कार्यरत थिए । प्रहरीले उनलाई सर्लाहीको लालबन्दी नगरपालिका–५, मेजरगञ्जबाट पक्राउ गरेको जनाएको छ ।
पक्राउ पर्नेमा ४६ वर्षीय शिवनन्दन राय र ४८ वर्षीय विखबहादुर भण्डारी पनि छन् । सर्लाहीको चन्द्रनगर गाउँपालिका–५ घर भएका राय चितवनको माडी नगरपालिका–२ मा बस्दै आएका थिए । उनी माडी चिस्यान केन्द्रमा दैनिक पारिश्रमिकमा काम गर्थे । उनलाई माडी नगरपालिका–१, भरुवाबाट पक्राउ गरिएको हो ।
सिन्धुपाल्चोकको कालिका गाउँपालिका–७ का स्थायी बासिन्दा भण्डारी पनि यही प्रकरणमा पक्राउ परेका छन् । उनी दुग्ध विकास संस्थानमा कनिष्ठ प्राविधिक सहायक तथा माडी चितवनस्थित चिस्यान केन्द्रका इन्चार्जका रूपमा कार्यरत थिए । उनलाई चितवनको माडी नगरपालिका–१ बाट नियन्त्रणमा लिइएको प्रहरीले जनाएको छ ।
प्रहरीको प्रारम्भिक अनुसन्धानले यस प्रकरणमा संस्थानको केन्द्रीय नेतृत्वदेखि चिस्यान केन्द्रमा कार्यरत कर्मचारीसम्मको संलग्नता रहेको देखाएको छ । विभिन्न स्थानमा रहेका चिस्यान केन्द्रका प्रमुख तथा कर्मचारीको भूमिकासमेत अनुसन्धानको दायरामा आएको छ । उनीहरूले कसरी समन्वय गरेर आर्थिक अनियमितता गरे र त्यसबाट कसले कति लाभ लिए भन्ने विषयमा थप अनुसन्धान भइरहेको छ ।
दुग्ध विकास संस्थान नेपाल सरकारको स्वामित्वमा रहेको सार्वजनिक संस्था हो । किसानबाट दूध संकलन, प्रशोधन तथा बिक्री वितरण गर्दै आएको संस्थानको आर्थिक कारोबारमा उच्च तहका अधिकारीदेखि चिस्यान केन्द्रका कर्मचारीसम्म जोडिएको आरोपले सार्वजनिक संस्थानको व्यवस्थापन र आन्तरिक नियन्त्रण प्रणालीमाथि प्रश्न उठाएको छ ।
यद्यपि, पक्राउ परेका आठै जनामाथि लगाइएको आरोप अनुसन्धानकै क्रममा छ । प्रहरीले उनीहरूबाट प्राप्त हुने बयान, कागजात तथा अन्य प्रमाणका आधारमा घटनाको थप विवरण खुलाउने जनाएको छ । प्रारम्भिक अनुसन्धानमा उल्लेख भएको १२ करोड १३ लाख ४३ हजार ५३० रुपैयाँको आर्थिक क्षति र गैरकानुनी लाभको विषय पनि थप अनुसन्धान तथा प्रमाणबाट पुष्टि हुन बाँकी छ ।
प्रहरीले कात्तिक १३ गते उनीहरूलाई पक्राउ गरी आपराधिक विश्वासघात र संगठित अपराधसम्बन्धी कसुरमा अनुसन्धान अघि बढाएको हो ।