प्रधान सम्पादकमा चालिसे नियुक्त

काठमाडौं (संवाददाता) – न्यूज २४ दैनिकको प्रधान सम्पादकमा नवराज चालिसे नियुक्त भएका छन् । चालिसेले आइतबारदेखि आफ्नो कार्यभार सम्हालेका छन् । तीर्थ कोइरालाले राजीनामा दिएपछि नेपाल न्यूज पब्लिकेशन प्रालिले प्रधानसम्पादकमा उनलाई नियुक्त गरेको हो । 

पत्रकारिता र आमसञ्चारमा एमफिल र संकट व्यवस्थापनमा स्नातकोत्तर गरेका चालिसे नेपाली पत्रकारितामा तीन दशकदेखि सक्रिय छन् । १२ वर्षयता उनी न्यूज २४ टेलिभिजनमा सक्रिय छन् । विभिन्न पत्रपत्रिका, टेलिभिजन, रेडियोमा काम गरेका चालिसेले केही समय बंगलादेशमा रहेर पनि पत्रकारिता गरेका थिए । उनी पत्रकारिता तथा आमसञ्चारका विषयमा पशुपति बहुमुखी क्याम्पसमा लामो समयदेखि अध्यापनरत पनि छन् ।

यस्तै, संस्थापक प्रधान सम्पादक कोइरालालाई पब्लिकेशनले आइतबार बिदाइ गरेको छ । बालुवाटारस्थित कार्यालयमा आयोजित कार्यक्रममा प्रमुख कार्यकारी अधिकृत गुणराज श्रेष्ठले पत्रिका स्थापनाका लागि कोइरालाले पुर्‍याएको योगदान अविस्मरणीय रहेको भन्दै आगामी दिनमा पुनः सहकार्य हुने आशा व्यक्त गरे । यस्तै नवनियुक्त प्रधान सम्पादक चालिसेलाई स्वागत गर्दै थप उत्साहका साथ पत्रिका प्रकाशन हुने विश्वास व्यक्त गरे ।