कुलमानको पार्टीमा नयाँ संरचना

काठमाडौं (संवाददाता) – ऊर्जामन्त्री कुलमान घिसिङको समर्थनमा बनेको भनिने ‘उज्यालो नेपाल पार्टी’ ले निर्वाचन आयोगमा आफ्नो ५१ सदस्यीय केन्द्रीय कार्यसमिति र पार्टी विधान अद्यावधिक गर्न निवेदन दिएको छ । गत साउनमै दर्ताका लागि निवेदन परेको दलले मंगलबार केन्द्रीय समिति संरचना हेरफेर गरी नयाँ नेतृत्व सूची पेस गरेको हो । 

नयाँ कार्यसमितिको अध्यक्षमा पूर्वसचिव ई. अनुपकुमार उपाध्याय (कैलाली) प्रस्तावित छन् । कार्यसमितिमा एमाले छाडेका नेता जितराम लामा, कलाकार रिमा विश्वकर्मा, पहिचानवादी नेता डा. महेन्द्रसुन्दर लावती, नागरिक उन्मुक्तिबाट समानुपातिक उम्मेदवार रहेकी तुलसा वाइबा, इलाम–२ का पूर्व उम्मेदवार डकेन्द्रसिं थेगिम, डा. अभिषेकराज सिंह लगायतको नाम छ ।

उक्त पार्टीको सूचीमा विभिन्न क्षेत्रका बुद्धिजीवी, पूर्व प्रशासक, कलाकार र सामाजिक अभियन्ताको नाम छ । पार्टीले आफ्नो चुनाव चिन्ह ‘चिम’ (बिजुलीको बल्ब) प्रस्ताव गरेको केन्द्रीय सदस्य जितराम लामाले जानकारी दिए ।

लामाका अनुसार, पार्टी निर्माणमा विभिन्न पृष्ठभूमिका व्यक्ति, जसमा विवेकशील साझा पार्टी छाडेका र पहिचानवादी धारका नेताहरू समेत सक्रिय छन् । 

अध्यक्ष उपाध्यायले बुधबारबाट केन्द्रीय सदस्यहरूको औपचारिक सनाखत प्रक्रिया सुरु हुने बताएका छन् । हालको कार्यसमितिमा ऊर्जामन्त्री कुलमान घिसिङको नाम समावेश नभए पनि, पार्टीलाई उनको नीति र सोचको निरन्तरता दिने उद्देश्यले अघि बढाइएको बताएको छ ।

‘उज्यालो नेपाल पार्टी’ यसअघि नै आयोगमा दर्ता भइसकेको भए पनि नयाँ विधान र अद्यावधिक कार्यसमितिसँगै पार्टीले राजनीतिक रूपमा सक्रियता बढाउने संकेत दिएको छ ।

यस्तो छ पदाधिकारी सूची