शेयरबजार समान्य घट्याे

काठमाडौं । शेयरबजार सोमबार सामान्य रहेको छ । कारोबार मापक नेप्से परिसूचक ३.०२ अंकले घटेर २,६०६.६७ विन्दुमा कायम भएको छ । चार अर्ब ६६ करोड ९५ लाख रुपैयाँ बराबरको एक करोड एक लाख ४६ हजार ४०० कित्ता शेयर किनबेच भएको छ ।

कारोबार भएका २५८ कम्पनीमध्ये १४७ वटाको शेयरमूल्य घटेको छ भने ९९ वटाको बढेको छ । बाँकी १२ वटाको स्थिर रहेको छ ।

कारोबार सुरु भएको केही मिनेटमा घट्न थालेको बजार पछि सम्हालिँदै २,६१८ विन्दुसम्म पुगेको थियो । तर सो विन्दुमा पनि नेप्से अडिन सकेन र फेरि तल ओर्लियो । बजार रातो बने पनि बजारले २६००को सपोर्ट लाइनलाई ब्रेक गर्न भने सकेन ।

सूचीकृत १३ समूहमध्ये पाँच वटा बढेका छन भने आठ वटा घटेका छन् । जलविद्युत समूह, जीवन बीमा, उत्पादन तथा प्रशोधन, निर्जीवन बीमा र ब्यापार समूह बढेका छन् । बैंकिङ, विकास बैंक, फाइनान्स, होटल तथा पर्यटन, लघुवित्त, म्युचुअल फण्ड र अन्य समूह घटेका छन् ।

बजार घटे पनि चार कम्पनीको शेयरमूल्यमा सकारात्मक सर्किट लागेको छ । अपर स्यांगे हाइड्रोपावर, स्वस्तिक लघुवित्त, झपा इनर्जी र श्रीनगर एग्रिटेक इन्डस्ट्रिजको शेयरमूल्यमा सकारात्मक सर्किट लागेको हो । सबैभन्दा धेरै सपोर्ट माइक्रोफाइनान्सको शेयरमूल्य ५.१६ प्रतिशत घटेको छ ।

ङादि ग्रुप पावरको शेयरकारोबार सबैभन्दा धेरै ५५ करोड ८६ लाख रुपैयाँको भएको छ । लगानीकर्ताको सम्पत्ति एक दिनमा पाँच अर्ब रुपैयाँ घटेको छ । बजार पुँजीकरण ४३ खर्ब ७६ अर्ब रुपैयाँ कायम भएको छ । साधारण शेयरतर्फको बजार पुँजीकरण पनि दुई अर्ब रुपैयाँ घटेर १४ खर्ब ७९ अर्ब रुपैयाँ कायम भएको छ ।