किङलाई स्तब्ध पार्दै लायन्स फाइनलमा

दोस्रो संस्करणको नेपाल प्रिमियर लिग (एनपीएल)मा आज कीर्तिपुरस्थित त्रिवि क्रिकेट मैदानमा लगातार हुँदै गर्दा तीन महत्वपूर्ण चरण पूरा गरियो– टस, लक्ष्य निर्धारण र अन्ततः फाइनल प्रवेशको टुंगो । पहिलो क्वालिफायरमा सुदूरपश्चिमसँग पराजित भएको विराटनगर किंग्सले दोस्रो क्वालिफायरमा पनि अपेक्षित प्रदर्शन गर्न नसक्दा लुम्बिनी लायन्सले फाइनल यात्रा सुनिश्चित गरेको छ ।

टसका दौरान विराटनगरका कप्तान सन्दिप लामिछानेले टस जितेर पहिला बलिङ रोजेपछि मैदानको वातावरण सुरुदेखि नै रोमाञ्चक बनेको थियो । लुम्बिनीलाई रोक्न बलिङ रोजिएको रणनीतिले केही समय प्रभाव जमाए पनि समग्रमा लुम्बिनीले सन्तुलित स्कोर बनाउन सफल भयो । पहिला ब्याटिङका लागि पठाइएको लुम्बिनी लायन्सले निर्धारित २० ओभरमा आठ विकेटको क्षतिमा १३४ रनको प्रतिस्पर्धात्मक योगफल बनाएको थियो ।

लुम्बिनीका लागि डार्शी शर्टले उत्कृष्ट पारी खेले । ४१ बलमा तीन चौका र एक छक्कासहित उनले ४५ रन बनाए । कप्तान रोहितकुमार पौडेलले ३४ रन थपे भने ओपनर निशोसन डिक्वेला २९ रनमा अविश्वसनीय चार चौका फुत्काउँदै योगदान दिए । इनिङ्सको अन्त्यतिर रुबेल ट्रम्पलम्यानले अविजित ११ रन जोड्दै स्कोर स्थिर राखे ।

बलिङतर्फ विराटनगरका सुवास भण्डारी र प्रशित जिसी आक्रमणको केन्द्रविन्दु बने । ती दुवैले तीन–तीन विकेट लिँदै प्रभावशाली प्रदर्शन गरे । कप्तान सन्दिप लामिछानेले पनि दुई विकेट झारे । यद्यपि, बलिङ सफल रहे पनि विराटनगरको मुख्य चुनौती भने लक्ष्य पछ्याउने क्रममा देखियो ।

१३५ रनको मध्यम लक्ष्य पछ्याउँदै मैदान उत्रिएको विराटनगर किंग्स मात्र १७.४ ओभरमै ९४ रनमा समेटियो । टिमका लागि साम हेजल्टले ३४ रन बनाए भने नरेन भट्टले २१ रनको योगदान दिए । अन्य ब्याटरहरू लुम्बिनीका बलरहरूको कडाइमा जकडिँदा टोली ठूलो अन्तरले पराजित भयो । लुम्बिनीका तिलक भण्डारी तीन विकेटसहित उत्कृष्ट बलर बने । रुबेन ट्रम्पलम्यान, अभिषेक गौतम र जेजे स्मिथले दुई–दुई विकेट लिदै विराटनगरको पंक्ति भत्काए । लिग चरणमै विराटनगरलाई पराजित गरेको लुम्बिनीले एलिमिनेटर र दोस्रो क्वालिफायर दुवैमा स्थिर प्रदर्शन गर्दै अन्ततः फाइनलसम्मको यात्रा तय गरेको हो । अब उपाधिका लागि लुम्बिनी लायन्सले शनिबार सुदूरपश्चिम रोयल्ससँग भिड्नेछ । पहिलो संस्करणको उपविजेता सुदूरपश्चिमले यसअघि नै विराटनगरलाई पराजित गर्दै फाइनल बुक गरिसकेको छ ।

ब्याटरले रन बनाउने जिम्मेवारी नलिँदा खेल हार्न पुग्यौँः मुख्य प्रशिक्षक धमीका

लुम्बिनी लायन्स दोस्रो संस्करणको नेपाल प्रिमियर लिग (एनपिएल) को फाइनलमा पुगेको छ । आज सम्पन्न दोस्रो क्वालिफायरमा विराटनगर किंग्सलाई ४० रनले पराजित गरेर लुम्बिनी फाइनलमा पुगेको हो । लुम्बिनीले अब फाइनलमा मंसिर २७ गते सुदूरपश्चिम रोयल्सको सामना गर्नेछ । यो सिजनमा नयाँ टोली च्याम्पियन बन्ने पक्का छ । गत संस्करणको विजेता जनकपुर बोल्ट्स लिग चरणबाटै बाहिरिएको थियो ।

विराटनगर तेस्रो हुँदै प्रतियोगिताको उपाधि होडबाट बाहिरिएको छ । आजको खेलमा जीतका लागि पाएको १३५ रनको लक्ष्य पछ्याएको विराटनगर ९४ रनमा समेटियो । ब्याटरले जिम्मेवारी नलिँदा खेल हार्नुपरेको सञ्चारकर्मीसँगको प्रतिक्रियामा विराटनगरका मुख्य प्रशिक्षक धमीका प्रसादले बताए । लक्ष्य सहज रहेको भए पनि ब्याटरहरूले एक सय रन पनि कटाउन नसकेको र यसको जिम्मेवारी पनि ब्याटरहरूले नै लिनुपर्ने उनको भनाइ थियो ।

लुम्बिनीलाई बढीमा १२० रनमा रोक्ने लक्ष्य रहेको भए पनि १४ रन थप जोडेको मुख्य प्रशिक्षक प्रसादले बताए । पावरप्लेदेखि नै विकेट गुमाउँदै गएका कारण आजको खेलमा हार बेहोर्नुपरेको उनको भनाइ थियो ।

फाइनल पुगेपछि लुम्बिनी लायन्सका ओपनर ब्याटर डार्सी सर्टले लिग चरणबाटै सङ्घर्ष गरेर फाइनल पुगेको बताए । लिग चरणबाटै सबै खेल जित्नैपर्ने स्थितिबाट आएको उल्लेख गर्दै उनले अब फाइनल खेल जितेर च्याम्पियन बन्ने बताए ।