साताको अन्तिम दिन ९ अंकले बढ्यो नेप्से

काठमाडौं । साताको अन्तिम कारोबार हुने दिन बिहीबार सेयर बजार परिसूचक नेप्से उकालो लागेको छ । लगातार चार दिन बढेर बुधबार ९.४३ अंकले घटेको नेप्से बिहीबार ९.२३ अंकले बढेर २७१४.६१ अंकमा उक्लिएको हो ।

अन्तिम आधा घण्टामा बजार उकालो लाग्दा बैंक, म्युचअल फन्ड र ट्रेडिङबाहेकका सबै समूहमा हरियाली छाएको छ । बैंक समूह ०.३१, म्युचुअल फन्ड ०.०७ र व्यापार समूह १.१६ प्रतिशतले घटेको हो । वित्त २.३८, विकास बैंक १.५१, होटल तथा पर्यटन १.२६ र उत्पादनमूलक समूह भने १.३५ प्रतिशतले बढेका छ । बाँकी समूहको वृद्धि १ प्रतिशतभन्दा कम छ ।

नेप्सेसँगै कारोबार रकम पनि बढेको छ । बुधबार ८ अर्ब ७९ करोडको कारोबार भएको बजारमा बिहीबार ९ अर्ब ७ करोड ३९ लाख रुपैयाँको कारोबार भएको हो ।

बिहीबार १६२ कम्पनीको सेयर मूल्य बढेको छ भने १० कम्पनी स्थिर रहँदा ८८ कम्पनीको सेयर मूल्य घटेको छ । एसवाई प्यानल, श्रीनगर एग्रिटेक र त्रिशूली जलविद्युत् कम्पनीको सेयर मूल्यमा सकारात्म्क सर्किट लागेको छ । त्यस्तै कर्पोरेट डेभलपमेन्ट बैंक र एक्सेल डेभलपमेन्ट बैंकको सर्किट लेभलमा कारोबार भएको छ ।

कालिका पावर कम्पनीको सेयर मूल्य बिहीबार सबैभन्दा धेरै ६.२५ प्रतिशतले घटेको छ । त्यस्तै, फस्र्ट माइक्रोफाइनान्स, मैलुङ खोला जलविद्युत कम्पनी र गुर्खाज फाइनान्स पनि धेरै मूल्य घट्ने कम्पनीको सूचीमा शीर्ष स्थानमा छन् ।

बिहीबार आँखु खोला जलविद्युत आयोजनाको सबैभन्दा धेरै ४० करोड ८२ रुपैयाँको सेयर किनबेच भएको छ । त्यस्तै मञ्जुश्री फाइनान्सको ३५ करोड ९४ लाख, एसवाई प्यानलको ३२ करोड ९५ लाख र बन्दीपुर केबलकारको २८ करोड २७ लाख रुपैयाँको सेयर कारोबार भएको छ ।