उम्मेदवार चिनौंः रवि लामिछाने

पत्रकारिताबाट सत्ता–राजनीतिसम्मको असाधारण यात्रा
नेपाली सार्वजनिक जीवनमा रवि लामिछाने एउटा यस्ता पात्र हुन्, जसले टेलिभिजनको स्टुडियोबाट सुरु गरेको यात्रालाई छोटो समयमै राष्ट्रिय राजनीतिको केन्द्रसम्म पु¥याए । जनताको पीडा बोल्ने पत्रकार, नेतृत्वलाई प्रश्न गर्ने आवाज हुँदै राष्ट्रिय राजनीतिको केन्द्रबिन्दु बनेका रविको जीवन यात्रा बहुआयामिक, विवादास्पद र उत्तिकै प्रभावशाली देखिन्छ । 
प्रारम्भ ः पत्रकारिताबाट पहिचान
टेलिभिजन पत्रकारितामार्फत उनले आम जनताको आवाजलाई सशक्त रूपमा प्रस्तुत गरे । विशेषगरी सिधा कुरा जनतासँग कार्यक्रमले उनलाई देशव्यापी लोकप्रियता दिलायो । प्रशासनिक ढिलासुस्ती, सामाजिक अन्याय र राजनीतिक विकृतिमाथि उनले उठाएका प्रश्नले उनलाई “जनताको प्रतिनिधि पत्रकार” को रूपमा स्थापित ग¥यो । 
नयाँ बाटो ः मिडियाबाट राजनीति
टेलिभिजन यात्रामा उनले न्यूज २४ टेलिभिजन छाडेर आफ्नै लगानीमा ग्यालेक्सी ४ के स्थापना गरे । त्यहाँ पनि जनजीविकाका मुद्दामा केन्द्रित कार्यक्रममार्फत उनले लोकप्रियता अझ बढाए । २०७९ असारमा उनले टेलिभिजन छाडेर औपचारिक रूपमा राजनीति रोजे । ७ असारमा घोषणा भएको राष्ट्रिय स्वतन्त्र पार्टी (रास्वपा) उनको राजनीतिक यात्राको निर्णायक मोड बन्यो । नयाँ पार्टीले छोटो समयमै देशव्यापी संगठन निर्माण ग¥यो र जनतामा वैकल्पिक शक्तिको रूपमा उभियो । 
चुनावी सफलता र सत्ता प्रवेश 
२०७९ को प्रतिनिधिसभा निर्वाचनमा रास्वपाले प्रत्यक्ष र समानुपातिक गरी २० सिटमा जित हासिल गर्दै चौथो ठूलो शक्ति बन्न सफल भयो । रवि आफैले पनि चितवन २ बाट भारी मतान्तर सहित जित हासिल गरे । त्यसपछि पुष्पकमल दाहाल प्रचण्ड नेतृत्वको सरकारमा उनले उपप्रधान तथा गृहमन्त्रीको जिम्मेवारी पाए । उपप्रधान सहित गृहमन्त्री भएकै बेला नागरिकता विवादका कारण उनको सांसद र मन्त्री पद गुम्यो । उपनिर्वाचनमा फेरि बिजयी भई आफ्नो जनाधार कायम राखे । पार्टी स्थापनाको पाँच महिनामै यस्तो परिणाम ल्याउनु नेपाली राजनीतिमा असाधारण उपलब्धि मानियो । 
लोकप्रियता, विवाद र चुनौती
रवि लामिछानेको यात्रा केवल सफलताले भरिएको छैन—विवादले पनि उत्तिकै पछ्याएको छ । नागरिकता प्रकरणदेखि सहकारी रकम दुरुपयोग आरोपसम्म उनले कानुनी र राजनीतिक दबाब सामना गरिरहेका छन् । सत्ता प्रवेश र गृहमन्त्री पदको भूमिकाले समर्थक र आलोचक दुवैको ध्यान ताने । सहकारी काण्डमा उनको नाम जोडिँदा “किन मात्र रवि?” भन्ने बहस सार्वजनिक रूपमै उठ्ने गरेको छ । 
राजनीतिक विश्लेषणः उदय र सम्भावना
रवि लामिछानेको उदय पुराना दलप्रतिको जनअसन्तोषको प्रत्यक्ष परिणाम हो । उनले प्रतिनिधित्व गरेको राजनीतिक शैली भावनात्मक समर्थन, प्रत्यक्ष संवाद र जनसरोकारमा आधारित थियो । आज उनको यात्रा नेपाली राजनीतिमा एउटा महत्वपूर्ण केस स्टडी बनेको छ । टेलिभिजनको पर्दामा प्रश्न सोध्ने व्यक्ति आज नेपाली राजनीतिको मियो बनेर उभिएका छन् । अब ईतिहासले उनलाई कस्तो नेता बनाउँछ भन्ने निर्णय उनले गर्ने कामले तय गर्नेछ ।