फिफा–युट्युब सहकार्य

युट्युबले मंगलबार फिफासँग एक विश्वकपसम्बन्धी सम्झौता गरेको छ, जसअनुसार प्रसारण अधिकार भएका टेलिभिजन संस्थाहरूले खेलको प्रत्यक्ष दृश्य (लाइभ एक्सन) यस भिडियो प्लेटफर्ममा स्ट्रिम गर्न सक्नेछन् । यसले विश्वभरका युवा दर्शकहरूसम्म पहुँच विस्तार गर्ने उद्देश्य राखेको जनाइएको छ ।
फिफाले यसलाई खेल परिवर्तन गर्ने साझेदारी भनेको छ । सम्झौताअनुसार विश्वकपका प्रसारण अधिकारधारीहरूलाई जुन ११ देखि जुलाई १९ सम्म हुने प्रतियोगिताका खेलहरूको पहिलो १० मिनेट युट्युबमा प्रसारण गर्न प्रोत्साहित गरिनेछ । यसलाई एक प्रकारको ‘झलक’ का रूपमा हेरिएको छ, जसले दर्शकलाई पछि नेटवर्क टीभी जस्ता परम्परागत माध्यमहरूमा पूरा खेल हेर्न आकर्षित गर्नेछ ।
यसका साथै, प्रसारणकर्ताहरूले आफ्नो युट्युब च्यानलमार्फत केही छनोट गरिएका खेलहरू पूर्ण रूपमा पनि स्ट्रिम गर्न सक्नेछन्, जसले विश्वव्यापी दर्शकहरूलाई संलग्न गराउँदै प्रतियोगिताका बाँकी खेल कहाँ हेर्ने भन्ने जानकारी पनि दिने फिफाले जनाएको छ । यो सम्झौताबाट फिफाले कति आर्थिक लाभ पाउनेछ भन्ने विवरण सार्वजनिक गरिएको छैन ।
फिफाले आफ्नो विश्वकप आर्काइभको केही सामग्री पनि युट्युबमा साझेदारी गर्ने जनाएको छ, जसमा विगतका पूर्ण खेलहरू तथा फुटबल इतिहासका चर्चित क्षणहरू समावेश हुनेछन् ।
युट्युब यसअघि २०२२ मा फिफा वल्र्डकप कतार २०२२ का लागि तल्लो स्तरको प्रायोजक (लोअर–टेयर स्पोन्सर) थियो, जहाँ क्रिएटरहरू मैदानमै उपस्थित भएर पर्दापछाडिका रोचक सामग्रीहरू कैद गर्नेछन् भनिएको थियो । विश्वकप फुटबलको आगामी संस्करण अमेरिका, क्यानडा र मेक्सिकोले संयुक्तरूपमा आयोजना गर्दैछन्, त्यसमा फिफाले ‘विश्वभरका युट्युब  क्रिएटरहरूलाई अभूतपूर्व पहुँच’ प्रदान गर्ने जनाइएको छ । यो प्रतियोगितामा कुल १०४ खेलहरू हुनेछन् ।