पावर न्याप प्रतियोगितामा ८० वर्षीय विजेता

सोल, (रोयटर्स) । शनिबार हल्का वसन्तको घाममुनि, सयौँ युवा सोलबासीहरू हान नदी किनारको एउटा पार्कमा भेला भए । सहर सरकारले दिएको निमन्त्रणाअनुसार उनीहरू त्यही काम गर्न आएका थिए, जुन धेरै कामको चापमा रहेका दक्षिण कोरियालीहरूले पर्याप्त गर्न पाउँदैनन् । काम थियो, निदाउनु ।
सोल महानगर सरकारले आफ्नो तेस्रो वार्षिक वसन्त कार्यक्रमका रूपमा ‘पावर न्याप प्रतियोगिता’ आयोजना गरेको थियो । दिउँसो ३ बजे सुरु भएको कार्यक्रममा सहभागी हुन चाहनेहरूका लागि केही रोचक सर्त राखिएका थिए—‘सुत्ने सुन्दरी’ वा ‘राजकुमार’ जस्तो पहिरन लगाउने, थकित भएर आउने र पेट भरिएको हुनुपर्ने ।
२४ सै घण्टा खुला किनमेल केन्द्र, तीव्र प्रतिस्पर्धात्मक जीवनशैली र चिसो कफीका लागि परिचित सहरमा, पार्कको घाँसे मैदानमा फैलिएको थकान स्पष्ट देखिन्थ्यो ।
२० वर्षीय विद्यार्थी पार्क जुन–सोक, जो जोसोन राजवंशका राजाजस्तो रेशमी रातो पहिरनमा आएका थिए, भन्छन्, ‘परीक्षा तयारी र अंशकालीन कामबीच म राति तीन–चार घण्टा मात्र सुत्छु, दिनभर टेबलमै झप्की लिएर काम चलाउँछु । म यहाँ आफ्नो सुत्ने कला देखाउन र राजा कसरी सुत्छ भन्ने देखाउन आएको हुँ ।’
नजिकै २४ वर्षीया यु मि–योन थिइन् । उनी सोलको उत्तरतर्फ रहेको इल्सानकी अंग्रेजी शिक्षिका हुन् । उनी भने कोआला जनावरको आकृतिको नरम, ठूलो पहिरनमा देखिएकी थिइन् ।
उनी भन्छिन्, ‘मलाई सधैँ निद्रा नलाग्ने समस्या छ । सुत्न गाह्रो हुन्छ र सजिलै ब्यूँझिन्छु । कोआला गहिरो निद्राका लागि प्रसिद्ध छ । त्यसैले म ऊजस्तै भएर सुत्न सकूँ भन्ने आशाले यस्तो पहिरन लगाएर आएकी हुँ ।’
लगातार तेस्रो वर्ष आयोजना गरिएको यो प्रतियोगिताले दक्षिण कोरियामा रहेको दीर्घकालीन समस्यालाई उजागर गर्छ । तथ्यांकअनुसार, उच्च विकसित मुलुकहरुमध्ये दक्षिण कोरिया अत्यधिक काम गरिने र कम सुत्ने राष्ट्रमध्ये एक हो ।
दिउँसो ३ बज्नेबित्तिकै सहभागीहरूले आँखा ढाक्ने पट्टी लगाए र अधिकारीहरूले उनीहरूको मुटुको धड्कन मापन गरे, ताकि गहिरो र शान्त निद्राको अवस्था सुनिश्चित गर्न सकियोस् ।
प्रतियोगिताको विजेता भने ८० वर्षभन्दा माथिका एक पुरुष बने ।
३७ वर्षीय कार्यालय कर्मचारी ह्वाङ दु–सोंग उपविजेता बने । उनले भने, ‘राति काम गर्ने पालो र दैनिक कामका कारण म निकै थाकेको थिएँ । साथै, कामकै लागि धेरै सवारी चलाउनुपर्छ । यो प्रतियोगिताबारे थाहा पाएपछि नदीको हावामा राम्रोसँग सुत्ने र ऊर्जा पुनः प्राप्त गर्ने सोचले आएको थिएँ । दोस्रो स्थान पाउँदा निकै खुसी छु ।’