शाकिराको कन्सर्टमा २० लाख दर्शक

ब्राजिलको रियो दि जेनेरियोस्थित कोपाकाबाना समुद्रकिनारमा शनिबार आयोजित कोलम्बियाली पप गायिका शाकिराको निःशुल्क कन्सर्टमा करिब २० लाख संगीतप्रेमी सहभागी भएको सहरका अधिकारीहरूले आइतबार जनाएका छन् । यो उनको करिअरकै सबैभन्दा ठूलो कार्यक्रम मानिएको छ ।
रियोको चर्चित समुद्रकिनारमा हुने यस्ता भव्य कार्यक्रमहरू सहरका लागि ठूलो आकर्षण बन्दै गएका छन् । पछिल्ला वर्षहरूमा म्याडोना र लेडी गागाले पनि त्यहीँ विशाल प्रस्तुति दिएका थिए ।
यस्ता कार्यक्रमहरू ‘टोडो मुन्डो नो रियो’ उत्सवमार्फत पर्यटन प्रवर्धन र अन्तर्राष्ट्रिय ध्यान आकर्षित गर्न प्रयोग भइरहेका छन् । खासगरी मे महिनामा यहाँ निकै कम पर्यटक आउने भएकाले पर्यटकहरूको आकर्षणका लागि सहरले यस्तो सांगीतिक पर्वको आयोजना गर्न थालेको हो ।
कार्यक्रमको सुरुवात ड्रोन प्रदर्शनबाट भएको थियो । जसले समुद्र–किनारमाथि शाकिरासँग सम्बन्धित ‘ब्वाँसो’को आकृति देखाएको थियो । त्यसपछि उनले पोर्चुगिज भाषामा दर्शकलाई सम्बोधन गरिन् ।
४९ वर्षीया उनले ‘हिप्स डोन्ट लाइ’, ‘एन्थोलोजिया’ र २०१० को विश्वकपको चर्चित गीत ‘वाका वाका’जस्ता लोकप्रिय गीत प्रस्तुत गरेकी थिइन् । साथै ब्राजिलका कलाकार अनिट्टा, काएतानो भेलोसो, मारिया बेथानिया र इभेटे सांगालोसँग संयुक्त प्रस्तुति दिइन् ।
यस कन्सर्टले करिब १६ करोड डलर बराबरको आर्थिक गतिविधि सिर्जना गरेको छ । यो कार्यक्रमले होटल, रेस्टुरेन्ट, यातायात र खुद्रा व्यापार क्षेत्र लाभान्वित बनाएको थियो ।
अधिकारीहरूले ‘टोडो मुन्डो नो रियो’ उत्सवलाई कम्तीमा सन् २०२८ सम्म सहरको आधिकारिक कार्यक्रम तालिकामा राखिने बताएका छन् ।