स्थानीय पहिचानका लागि महोत्सव

काठमाडौं महानगरपालिका वडा नं. २२ क्षेत्रमा आज बृहत् वडा महोत्सव आयोजना गरिएको छ। महोत्सवमार्फत वडा क्षेत्रभित्र रहेका ऐतिहासिक, सामाजिक, सांस्कृतिक, धार्मिक तथा व्यावसायिक सम्पदाको प्रवद्र्धन र संरक्षण गर्ने उद्देश्यका साथ महोत्सव आयोजना गरिएको हो ।
वडा अध्यक्ष चिनी काजी महर्जनका अनुसार वडा क्षेत्रका जीवन्त कला, संस्कृति र स्थानीय पहिचानलाई एकै थलोमा प्रस्तुत गर्ने उद्देश्यले महोत्सव आयोजना गरिएको हो ।
महोत्सव अन्तर्गत नयाँ सडक, प्युखा, वटु, सुन्धारा, टेबहाल, धर्मपथ र खिचापोखरी लगायतका स्थानमा विभिन्न सांस्कृतिक तथा मनोरञ्जनात्मक कार्यक्रम सञ्चालन गरिएको छ ।
कार्यक्रममा धिमे बाजा प्रतियोगिता, दीपक बज्राचार्य एण्ड रिदम ब्यान्ड तथा कुटुम्ब को लाइभ प्रस्तुति समेत रहेको छ भने साथै स्थानीय कलाकारद्वारा परम्परागत बाजा, नृत्य तथा गीत प्रस्तुत गरिएको छ ।
महोत्सवमा १५० भन्दा बढी हस्तकला, घरेलु उत्पादन, रेडिमेड पोशाक, जुत्ता, ब्याग, मोबाइल तथा इलेक्ट्रिक सामग्रीका स्टल राखिएका छन् भने ५० भन्दा बढी परम्परागत तथा अन्य खानाका परिकारको प्रदर्शनी गरिएको छ ।
यसैगरी भाषा साहित्य महोत्सव, सम्मान कार्यक्रम, ऐतिहासिक तस्बिर तथा चित्र प्रदर्शनी, बाल मनोरञ्जन कार्यक्रम र ६ स्थानमा रक्तदान कार्यक्रमसमेत आयोजना गरिएको आयोजकले जनाएको छ ।
स्थानीय कला, संस्कृति र व्यवसायलाई प्रवद्र्धन गर्दै समुदायबीच आपसी सम्बन्ध बलियो बनाउने उद्देश्यले आयोजना गरिएको यो महोत्सवमा सर्वसाधारणको उल्लेख्य सहभागिता देखिएको छ । तस्बिरः नेपाल फोटो लाइब्रेरी