गायिका शाकिरालाई ५५ मिलियन युरो फिर्ता गर्न स्पेनलाई आदेश

स्पेनको कर प्रशासनलाई कोलम्बियाली पप सुपरस्टार शाकिरालाई कर विवादमा गलत रूपमा जरिवाना लगाएको ठहर गर्दै ५५ मिलियन युरो (करिब ६४ मिलियन अमेरिकी डलर) भन्दा बढी रकम फिर्ता गर्न अदालतले आदेश दिएको छ ।
म्याड्रिडस्थित राष्ट्रिय उच्च अदालतले सोमबार सार्वजनिक गरेको निर्णयअनुसार कर अधिकारीहरूले सन् २०११ मा शाकिरा स्पेनमा १८३ दिनभन्दा बढी बसेको निष्कर्ष निकालेका थिए र उनलाई व्यक्तिगत आयकर तिर्नुपर्ने भन्दै ठूलो जरिवाना लगाएका थिए ।
तर अदालतले प्रमाणका आधारमा शाकिरा केवल १६३ दिन मात्र स्पेनमा रहेको ठहर गर्दै उनी कर प्रयोजनका लागि त्यहाँको बासिन्दा नभएको स्पष्ट पारेको छ । यसै कारण कर दाबी नै गलत भएको अदालतको निष्कर्ष छ ।
शाकिरा र उनका प्रतिनिधिहरूले यो निर्णयलाई “निर्णायक र ऐतिहासिक” भन्दै स्वागत गरेका छन् । उनले लामो समयसम्म आफ्नो प्रतिष्ठामाथि गरिएको आक्रमण र मानसिक तनावको उल्लेख गर्दै अदालतको निर्णयले अन्ततः सत्य स्थापित गरेको बताइन् ।
अदालतले यो फैसला केवल सन् २०११ को करसम्बन्धी मुद्दामा सीमित रहेको स्पष्ट पारेको छ ।
यसअघि २०२३ मा शाकिराले २०१२–२०१४ को छुट्टै कर विवादमा १७.५ मिलियन युरो तिरेकी थिइन् र अतिरिक्त जरिवानासमेत स्वीकार गरेकी थिइन् ।