बढ्दो महँगीमा पनि घटेन बोटक्सको माग

जुग, (एजेन्सी) । स्विट्जरल्याण्डमा मुख्य कार्यालय रहेको चर्मरोग (डर्माटोलोजी)सम्बन्धी समूह ‘गाल्डेर्मा’को शेयर उछालमा छ  । यसको मुख्य कारण चाहिँ यस्तो संकटका बाबजुद पनि छालाको स्याहार गर्न रुचाउने समूह दिनदिनै बढ्नु हो ।
खर्च गर्न योग्य आम्दानीमा गिरावट आए पनि बोटक्स र फिलर्सजस्ता सुईमार्फत गरिने उपचारका प्रयोगकर्ताहरूले यसलाई आफ्नो प्राथमिकतामा राखेपछि कम्पनीको नाफा पनि बढिरहेको छ र यसको शेयर पनि बढेको बढ्यै छ ।
स्विट्जरल्याण्डको यो स्किनकेयर कम्पनीका प्रमुख कार्यकारी फ्लेमिङ ओन्र्सकोभले उपभोक्ताहरूले आफ्नो अनुहारलाई पहिलो प्राथमिकतामा राख्ने गरेकाले संसारभर पाई पाई बचाउन उपभोक्ताहरूको दौड भए पनि आफ्नो सेवा लिनेहरूको संख्या भने नघटेको बताए । यसले के संकेत गर्छ भने बढ्दो मुद्रास्फीति (महँगी)को समयमा पनि महँगा छाला उपचार सेवाहरू अझै प्रभावित भएका छैनन् ।
‘के उनीहरूलाई पेट्रोलियम पदार्थको मूल्य वृद्धिले फरक पार्दैन ? पार्छ । तर, के तेलको मूल्य बढेका कारण उनीहरू सुई लगाउन छोड्छन् त ? पक्कै छोड्दैनन्,’ ओन्र्सकोभले भने । उनले गाल्डेर्माका मुख्य ग्राहकहरूको आर्थिक अवस्था प्रायः ‘राम्रो’ हुने गरेको पनि थपे ।
स्विट्जरल्याण्डको जुगमा मुख्यालय रहेको यस समूहले ‘न्यूरोमोड्युलेटर’ (जस्तै बोटक्स, जसले अनुहारको मांसपेशीलाई आराम दिएर चाउरीपना कम गर्छ) र ‘फिलर्स’ (जसले छालामुनि भाग भर्ने काम गर्छ)को बढ्दो प्रयोगबाट ठूलो फाइदा उठाएको छ ।
अमेरिकी औषधि उत्पादक कम्पनी ‘एबभी’ (बोटक्सको निर्माता) पछि गाल्डेर्मा सुईमार्फत गरिने उपचार (इन्जेक्टेबल्स) क्षेत्रको दोस्रो ठूलो समूह बनेको छ । यसले ‘डिस्पोर्ट’जस्ता प्रतिस्पर्धी उत्पादनहरूमार्फत बजारमा आफ्नो हिस्सा बढाउँदै लगेको छ । अहिले अमेरिकाको इन्जेक्टेबल्स बजारमा गाल्डेर्माको हिस्सा ३१ प्रतिशत पुगेको छ ।
ओन्र्सकोभले आर्थिक अवस्था कसिलो हुँदा पनि उनका ग्राहकहरूले राम्रो देखिनु र राम्रो महसुस गर्नुलाई ‘प्राथमिकता’मा राखेको बताए । छालाको उपचारमा देखिएको यो स्थिरताले ‘लिपस्टिक इफेक्ट’लाई चरितार्थ गर्छ— जहाँ आर्थिक मन्दीको समयमा महँगा लुगाका ब्राण्डहरूको व्यापार घट्दा पनि स्किनकेयर र मेकअपको बिक्री भने बढ्ने गर्छ ।
सन् २०२६ को पहिलो त्रैमासिकमा गाल्डेर्माको बिक्री २५.५ प्रतिशतले बढेर १.५ अर्ब डलर पुगेको छ । यसको आंशिक श्रेय कम्पनीको ‘स्कल्प्ट्रा’ ब्राण्डको सफलतालाई जान्छ । यो सुईमार्फत लगाइने ‘बायोस्टिमुलेटर’ हो, जसले अनुहारमा कोलाजेन र इलास्टिनको उत्पादन बढाएर प्रयोगकर्तालाई प्राकृतिक रूपमा जवान देखिन मद्दत गर्छ ।
अमेरिकामा तौल घटाउने औषधिको बढ्दो प्रयोगले पनि स्कल्प्ट्राको बिक्रीमा उछाल ल्याएको छ । ओन्र्सकोभका अनुसार गाल्डेर्माले ती ‘जीएलपी–१’ प्रयोगकर्ताहरूलाई लक्षित गरेको छ, जसको छिटो तौल घट्दा अनुहारको छाला झुल्लिने समस्या हुन्छ । यस्ता उत्पादनहरूको बिक्री ‘दोहोरो अंक’का दरले विस्तार भइरहेको छ ।
गाल्डेर्माले रजस्वला रोकिएका (मेनोपजल) महिलाहरूलाई पनि लक्षित गरिरहेको छ, जसको हर्मोनमा हुने परिवर्तनका कारण छालामा समस्या देखिन्छ ।
‘मेनोपजल महिलाहरूमा सौन्दर्यसम्बन्धी ठूलो आवश्यकता थियो, जसतर्फ कसैको ध्यान गएको थिएन । छाला सुक्खा हुने र झुल्लिनेजस्ता धेरै समस्याहरू जीएलपी १ प्रयोगकर्ता र मेनोपज भएका महिलाहरूमा उस्तै देखिन्छन्,’ ओन्र्सकोभले भने ।