सिओलमा नेपालको पर्यटन प्रवर्धन

काठमाडौं । दक्षिण कोरियाको राजधानी सिओलमा आयोजित सिओल अन्तर्राष्ट्रिय पर्यटन मेला २०२६ मा नेपालले प्रमुख पर्यटकीय गन्तव्यहरूको व्यापक प्रवर्धन गरेको छ । नेपाल पर्यटन बोर्डको नेतृत्वमा सात नेपाली पर्यटन व्यवसायी सहभागी टोलीले जुन ४ देखि ७ सम्म कोएक्स प्रदर्शनी केन्द्रमा आयोजित मेलामार्फत नेपालको प्राकृतिक, सांस्कृतिक तथा साहसिक पर्यटनका सम्भावनाहरू अन्तर्राष्ट्रिय बजारमा प्रस्तुत गरेको हो ।
चार दिनसम्म सञ्चालन भएको मेलामा नेपाल प्याभिलियनले कोरियाली पर्यटन व्यवसायी, भ्रमण आयोजक कम्पनी तथा सर्वसाधारण आगन्तुकहरूको विशेष ध्यान आकर्षित गरेको बोर्डले जनाएको छ । मेलामा सहभागीहरूले विशेषगरी नेपालका पदयात्रा गन्तव्य, पर्वतीय पर्यटन, भ्रमण भिसा प्रक्रिया तथा हवाई सम्पर्कका विषयमा चासो व्यक्त गर्दै जानकारी लिएका थिए ।
कार्यक्रमका क्रममा कोरिया बाह्य पर्यटन संघका अध्यक्ष तथा प्रमुख कार्यकारी अधिकृत शिन जुंग मोक नेतृत्वको उच्चस्तरीय टोलीले नेपाल प्याभिलियनको अवलोकन गरेको थियो । त्यसैगरी, दक्षिण कोरियास्थित नेपाली दूतावासका कार्यवाहक राजदूत निर्मलप्रसाद भट्टराईले दूतावासको टोलीसहित नेपाल प्याभिलियनको भ्रमण गरी सहभागी पर्यटन व्यवसायी तथा आगन्तुकसँग अन्तक्र्रिया गरेका थिए । 
मेलाका क्रममा चर्चित कोरियाली कलाकार ह्वाङ मानसोकले आफ्नो चर्चित ‘गंगनम स्टाइल’ मूर्तिको तस्वीर नेपाल पर्यटन बोर्डलाई उपहारस्वरूप प्रदान गरेका थिए। करिब ४५ हजार दर्शक तथा आगन्तुक सहभागी रहेको मेलामा नेपालबारे उत्साहजनक चासो देखिएको बोर्डले जनाएको छ ।
नेपाल पर्यटन बोर्डका अनुसार मेलामा सहभागिताले नेपाली पर्यटन व्यवसायीहरूलाई विद्यमान व्यावसायिक साझेदारी सुदृढ गर्न तथा नयाँ सहकार्य विस्तार गर्न महत्वपूर्ण अवसर प्रदान गरेको छ। कोरियाली ट्राभल कम्पनी तथा अन्तर्राष्ट्रिय पर्यटन व्यवसायीसँग प्रत्यक्ष सम्पर्क र छलफलले आगामी दिनमा नेपालमा पर्यटक आगमन बढाउन सहयोग पुग्ने अपेक्षा गरिएको छ ।
यसैबीच, नेपाल पर्यटन बोर्डले जुन ४ देखि ६ सम्म सिओल र सुवनमा आयोजित विश्व पर्यटन उद्योग सम्मेलन–२०२६ मा पनि सहभागिता जनाएको थियो। सम्मेलनमा विश्वका विभिन्न मुलुकका पर्यटन नेतृत्वकर्ता तथा गन्तव्य प्रतिनिधिहरू सहभागी भएका थिए । सो अवसरमा बोर्डका निमित्त निर्देशक सुनील शर्माले विश्व पर्यटन बजारमा देखिएका नयाँ प्रवृत्ति तथा तिनले नेपालको पर्यटन क्षेत्रमा पार्ने प्रभावबारे प्रस्तुति दिएका थिए ।
नेपाल पर्यटन बोर्डका अनुसार सिओल अन्तर्राष्ट्रिय पर्यटन मेला विश्व पर्यटन उद्योगका पछिल्ला प्रवृत्ति, नवीन पर्यटन उत्पादन तथा गन्तव्यहरूको प्रवर्धनका लागि महत्वपूर्ण अन्तर्राष्ट्रिय मञ्चका रूपमा स्थापित छ । मेलामा विभिन्न पर्यटन प्रदर्शनी, अनुभव आदानप्रदान कार्यक्रम तथा विशेष यात्रा प्याकेजहरू प्रस्तुत गरिएका थिए । दक्षिण कोरिया नेपालका लागि उच्च सम्भावना बोकेको पर्यटन स्रोत बजारमध्ये एक मानिन्छ। वार्षिक करिब तीन करोड कोरियाली नागरिक विदेश भ्रमणमा जाने तथ्यांक रहेको छ । 
नेपाल पर्यटन बोर्डका अनुसार सन् २०२५ मा मात्रै २३ हजारभन्दा बढी कोरियाली पर्यटकले नेपाल भ्रमण गरेका थिए। कोरियाली पर्यटकहरू विशेषगरी पदयात्रा, पर्वतारोहण, हिमाली पर्यटन तथा नेपालको बौद्ध सम्पदाप्रति आकर्षित हुने गरेका छन् । 
नेपाल पर्यटन बोर्डका वरिष्ठ प्रबन्धक अर्चना केसी राणा तथा वरिष्ठ अधिकृत सुशीला कुमारी बरालले मेलामा नेपालको सहभागिता समन्वय गर्दै आयोजक, नेपाली प्रतिनिधिमण्डल तथा अन्तर्राष्ट्रिय आगन्तुकहरूसँग सहकार्य गरेका थिए । बोर्डले यस सहभागितामार्फत कोरियाली बजारमा नेपालको पर्यटन प्रवर्धन थप प्रभावकारी बन्ने विश्वास व्यक्त गरेको छ ।